تخيل انك رئيس الجمهوريه!!!

[mostafa_nader]

متستغربش اوي كده

يا عم انت حتدفع حاجة من جيبك ؟
الحلم ده على حسابى
غمض عينيك شوية واحلم انك بقيت رئيس البلاد


متقولش ازاى .. مش مهم
زورت الانتخابات ... او قلت للناس انتخبونى احسن ارمى نفسى من فوق البرج
فصعبت عليهم قاموا انتخبوك ..
او يكون لك واحد صاحبك امريكاوى بتكلمه على الياهوو
وقال لبوش انك ولد مجدع ورجولة وكفاءة
وانك من بتوع العولمة والعوالم والنظام العالمى الجديد لنج ..
ومش من اللى بيصلوا الفجر جماعة ...
فوافق بوش انك تقعد على ... الكرسى



المهم انك بقيت دلوقتى رئيس البلاد
مين قدك يا عم

حتاكل طعمية مقلية بزيت فرنساوى
وربنا حيتوب عليك من طعمية ابو هويدا المقلية بزيت العربيات



وحتتعالج من انيميا الفول .. الفول الجديد بقه يا عم من غير سوس



وابقى قابلنى لو لقيت اى مسمار فى العيش ...
حتاكل عيش من ابو الرغيف بربع جنيه ... سخن وطازة وطرى ..
تخيل .. طرى مش زى العيش اللى انت كنت بتاكله وانت بتشرب كباية ميه
ورا كل لقمة علشان تنزل



لا لا العيش ابو شلن ده اللى انت كنت بتجيبه من الفرن
وعقبال متوصل بيه البيت يسلجم ويقفع ويعرقص ...
وتعاقب عليه دوليا لأنه اصبح من اسلحة الدمار الشامل ... لا انسى الكلام ده خالص
الاوضاع حتتغير خالص ياعم ... دا انت ربنا حيكرمك خالص والله العظيم



طب بص دى ... حتاكل لحمة... متبرقش اوى كدة ... مش عارف يعنى ايه لحمة؟



( همّ حيقولولك )
وبعدين انته مش كنت بتسمع وانت قاعد على القهوة
وحاطط رجل على رجل وصباعك طالع من الجزمة
انهم حيستوردوا حاجة كدة من السودان واثيوبيا
آه فاكر ؟
اهى هى دى اللحمة
لا لا مش اللى انته كنت بتاكلها فى العيد ،
بتاعت العيد دى اسمها كرشة ... متفضحناش بقه الله يسترك



وحيبقى فيه كنتاكى .. متسألش ..
دى فراخ يعنى حتودع عم لطفى الفرارجى
اللى كان بيعين لك رجلين الفراخ وانته كنت بتقول له عشان الكلب
وكان ساعات يفوت لك حتتين قنصة على حتتين كبدة من بتوع الزباين
اللى بستحموا بصابون اجنبى



وحتشرب السيجارة كلها مرة واحدة .. يعنى مفيش تخميس
وبعدين دى سجاير ستراكى سترايك من بتاعت الست مارى منيب .. جو تانى



بس لما يخدوك علشان تحلف اليمين
ياعم دا غير يمين الطلاق اللى انته مصدره فى كل حدوتة تحكيها



اصحى معايا الله ينجيك
لما تروح تحلف اليمين اوعى تروح بالبدلة بتاعت جوازك ..
انته عارف ... دى بقت مكيفة الهواء من كل ناحية .
العربى جوز ام بطة عنده بدلة اخوه باعتهالو من بلاد بره ابقى استلفها منه
وإقضى مصلحتك وبعدين رجعهاله ... ماهى الجيران لبعضها امال ايه



وحياة رحمة امك يا شيخ متروح بالجزمة بتاعتك ...
عشان خاطرى ابقى اشتريلك جوز جزمة من بيع المصنوعات دى رخيصة هناك ....
لأن الحدوة اللى انته مركبها فى كعب الجزمة بتعمل صوت ....
قلق برضه ..
وبعدين ممكن الجهاز يصفر عليك تبقى حكاية .. فاهم ؟



اول يوم بس وبعدين همه بعد كدة حيتصرفولك فى جوزين جزم مستوردين
عشان تقابل بيهم اصحابك بتوع الدول التانية



وحتنام على سرير عليه مراتب .. المراتب دى بقه جواها قطن ...
ايوة قطن ... والله العظيم قطن ..
ايوه تمام زى القطن اللى انته جبته من الاجزخانة
للوله حودة ابنك لما الواد شحته ابن ام بيسة لزقه بالطوبة فى نافوخه فتحهاله



وجريت بيه على المستشفى قالولك هات لنا قطن
وشاش وميكروكروم وصبغة يود وبلاستر وسرنجة وحقنة تيتانوس وكيس دم
واقطع تذكرة بخمسة جنيه من شباك العلاج المجانى ....
ايوه هو ده القطن .. فهمت ؟



حتحلم احلام نضيفة على السرير دا يا عم الحاج

افرد طولك ... متخافش رجليك مش حتطلع برة الاوضة ....
انته مش فى بيتكم دلوقتى .. افرد افرد ... غمض عينيك كده .. غمض



ايه؟ ... انت نمت ؟ اصحى يا عم ...
اصحى ... الباب بيخبط ... الحق ..
موظفين الكهربا على الباب ...
الحق دول جايين يشيلوا العداد علشان بقالك 3 شهور مدفعتش الفاتورة








وسمعني رايك بعد اللي سمعته ده ؟


المهم بعد كده ايه اول 3 حاجات هتعملهم بمجرد انك تبقى رئيس الجمهوريه

[الحــــــب كــــــــدة]

اول حاجة اسجنك علشان متقلبش الناس علينا


يعنى اجيب ناس بتفهم فى الحكومة يعنى يمسكوا البلد صح مش يسرقوها ماهى مش ناقصة


واحاول اخلى القران هو الدستور الاول وبعدين الحاجات القوانين العادية بقى


وثالثا اهرب فلوس برا مصر هههههههههههه علشان لما اتشال من الرياسة ههههههههه

لالا بجد الثالثة اشيل قانون الطوارئ اللى غيروة بالارهاب

[free_arabian]

جناب حضرة الرئيس ((( العربى الحر ))) وصل .....<<< عايش الدور من اوله ههههههههههه



اليوم هو اول يوم تولي مهام الرئاسة .... و اكيد فيه قرارات جديدة كتير


** اول قرار اخلي الوزارة كلها تستقيل ... و اختار وزراء جدد ذوي مواصفات خاصة و خبرات معينة

و اركز اكثر شئ على اختيار وزير الزراعة .... ووزير الاعلام .... ووزير الخارجية ... ووزير التعليم .... ووزير المالية....وزير الصحة


اما وزير الداخلية ده له وضع خاص .!!!!!!


لازم كلهم يكونوا على درجة من الوعي و الخبرة بحيث يعتمد عليهم في وضع سياسات لصالح البلد و الشعب

** زراعة تكون غير مسرطنة و بعيدة عن الرشاوي في استيراد مبيدات زراعية محرمة دوليا ....

كذلك العمل على وضع خطط و مناهج للزراعة بحيث نركز على الزراعات الاساسية زي القمح و القطن لان بتوفيرهم هانحقق عملة صعبة عن طريق تخفيض استيراد القمح و تصدير اجود انواع القطن و كذلك توسيع الرقعة الزراعية و تقديم التسهيلات و القروض الائتمانية للمزارعين

** اعلام يكون موجه لخدمة و نهضة الاجيال بعيدا عن الاسفاف و تقديم برامج هادفة و توعية ثقافية و دينية غير متعصبة لكي يصبح الاعلام سلاح موجه لخدمة البلد مش سلاح يستخدم لهدم قيم و اخلاق اجيال بكاملها
مع منع بالطبع كل البرامج المسفة و الهايفة والكليبات الخارجة و الاهتمام بنشرات الاخبار لكي تنافس المحطات الفضائية الاخبارية العريقة

** سياسة خارجية لها توجه عربي و قومي واضح يهدف لتحقيق الحد الاقصى للمصالح الداخلية فالسياسة هي فن الممكن و لذلك كلما كان للبلد توجه سياسي خارجي محدد و قوي و ثابت كلما احترمتنا حتى الدول الاقوى

و العمل على توثيق العلاقات العربية و اعادة الدور الريادي في المنطقة و التنسيق العربي للتحكم في سلاح البترول و الموقع الجغرافي الهام للمنطقة العربية و كذلك منابع المياه و المعابر للمنطقة زي قناة السويس و الاستفادة من كل سبل الضغط الدولي لتقليل عامل التبعية للدول العظمى و ايجاد بدائل دايما للخيارات و القرارات الدولية


** تغيير شامل لسياسة التعليم ....

زيادة عدد المدارس لتخفيف اعداد الطلبة في كل فصل بحيث لا يزيد الفصل عن 35 طالب و كذلك انشاء مدارس جديدة من شأنه زيادة فرص العمل كبيرة للمدرسين في جميع التخصصات و اداريين و عمال و فنيين يعني بالمختصر كده فايدة تعم على الجميع و تحريك حالة الركود الفظيع الذي نعاني منه و تتحرك عجلة البيع والشراء و العمل و القضاء نسبيا على البطالة

تغيير المناهج كلية بحيث تواكب احدث الاساليب التي وضعتها الخبرات في المجال التربوي و الاجتماعي و تدريس الدين بشكل متعمق اكثر و اعطاءه نسبة درجات اكبر و تتغيير النظام الجامعي بحيث يكون موجه اساسا لسد حاجة سوق العمل و العمل على زيادة اعداد المنح الدراسية بالخارج بحيث تكون متاحة للجميع مش للواسطات فقط


** سياسات مالية جديدة توازن بين الدخل و الاسعار و الغاء حكاية الخصخصة دي و تطوير نظم الضرائب و الجمارك و التشديد الرقابي على التجار و اسعار السلع و تحديد سقف للاسعار خصوصا للسلع الضرورية و الحيوية مع تطوير نظام البنوك و الفوائد ..... الخ


** ااااااااااه جينا للصحة ....

تعميم و تطوير نظام التأمين الصحي ليشمل كل مواطن و في جميع تخصصات الطب و الرقابة على صناعة الادوية و اسعارها و تطوير المستشفيات الحكومية و دعم العلاج لغير القادرين

انشاء مراكز للبحث العلمي في كل مناطق الدولة وتوفير كافة الامكانيات للعلماء والنوابغ لتوفير اقصى درجات الامان الصحي و السيطرة على اي اوبئة او كوارث طبيعية محتملة الحدوث


((( الامن الداخلي )))


** اطلاق حرية الصحافة و تعديل الدستور والقوانين بحيث يمنع حبس اي صحفي في قضايا الراي العام بالطبع و محاربة صحف الفضائح

** اعيد شعار " الشرطة في خدمة الشعب " بدلا من شعار " الشرطة في خدمة السلطة " و تحجيم نفوذ رجال الشرطة بحيث فعلا تخدم العدالة و تكون اليد الاقوى في مواجهة اللصوص و المجرمين و حصن امان للمدنيين و الابرياء


** توفيررررررررررررررررررر اقصى درجات النزاهة في الانتخابات !!!!!!!!!

** اعادة ما يسمى بشرطة الدرك و خصوصا في المناطق النائية و توفير عامل الامن ليلا بتلك المناطق

** محاسبة من يسئ استخدام البلوتوث بالموبايل بأشد عقوبات صارمة

** اغلاق كافة النوادي الليلية و منع تقديم الخمور حتى للاجانب و السياح احترام لتقاليدنا و دينا و شريعتنا

** الرقابة على الموقع المخلة على شبكة النت و منعها تماما

** تحقيق معادلة الوفاق السلمي بين الشعب و السلطة الحاكمة بما يخلق نوع من بناء الثقة بينهم

**********************


ياااااااااااااااااااااااااه الحلم طويل جداااااااااااااااا


قلبت دماغنا بحلمك !!!!! سيبنا نسمع بقية الاحلام من الاعضاء ....اديني بتسلى بالاحلام التي لن تحقق الا في المشمش

ماشي الكلام و كفاية احلام !!!!!!




اتمنى اكون حكيت لكم حلمي من غير ما تكونوا مليتم منه .....


الف شكر اخي الكريم / مصطفى


موضوعك شيق و جميل و اتمنى من الجميع انهم يشاركوا فيه باحلامهم