سؤال صريح جدا .. ياترى احنا لسه بنحب مصر ؟؟

[الحــــــب كــــــــدة]

بسم الله الرحمن الرحيم






سؤال صريح جدا .. ياترى احنا لسه بنحب مصر ؟؟

السلام علييكم يا شباب(منتدى دردشة) .. جايين انهارده ومعانا موضوع فى غاية الخطورة لكل شاب مصري وفتاه مصرية وبنسألهم لسه بتحبوا مصر
يا ترى إحنا لسة بنحب مصر ؟؟؟؟؟
قبل ما تندفع وتقول طبعا دى مصر هى امى ونيلها هو دمى وتكلمنى عن شهامة ولاد البلد واخلاق بنت البلد وبنات وسط البلد ...... خلينا نتكلم بواقعية شوية .يا ترى يا جماعة مصر بتمثل لكل شاب فينا ايه ..... ياترى ذكرياتك الحلوة فيها اكتر ولا الوحشة ؟؟؟؟مصر بلدنا اللى اتحولت الحياة فيها لمعاناة مستمرة من اول ما تفتح عينيك الصبح لحد ما تغمضها باليل ...... تنزل الصبح من البيت ويبدأ الصراع .... صراع مع سواق الميكروباص وصراع مع ركاب الميكروباص ..... صراع مع زميلك فى الشغل وصراع مع ظابط المرور ومع سواق التاكسى ومع موظفين الحكومة ومع الناس اللى فى الشارع وصراع مع أصحابك فى الجامعة او المدرسة وصراع مع المدرسين ....... سيبك طبعا من صراع غض البصر اللى غالبا بتخسر فيه لأنك ممكن تخبط فى عامود نور وانت ماشى عشان مبقاش ينفع تبص غير فى الأرض ...... مصر اللى مبقاش فيها حاجة صح لا تعليم ولا صحة ولا إسكان .... مصر اللى الشرطة فيها بتقهرنا واصحاب رأس المال بيستعبدونا .... مصر اللى شعبها من كتر الهم والجوع اتخلقت عنده عقد نقص وكراهية ضد الأخرين ..... مصر اللى كتر فيها الإجرام وبدل شهامة ولاد البلد ... بقى تحرش الولاد بالبنات فى وسط البلد ..... مصر اللى تخاف على بنتك ومراتك واختك يمشوا لوحدهم فى الشارع خايف عليهم من 1000 خطر ... تحرش وسرقة وسفاح المعادى ورخامة امناء الشرطة وغلاسة ولاد البلد .شايفين بلادنا بقيت عاملة إزاى يا جماعة ؟؟؟ ....... يا جماعة محدش يفهم انى عايز اقول انى بكره بلادى او بحرض على كراهيتها ..... ابدا والله انا بفضفض عشان انا نفس مبقيتش فاهم ........ شايفين كل البلاوى اللى فى مصر دى ؟؟؟؟؟ بس برغم كدة حد فينا حاسس انه بيكره مصر ؟؟؟؟؟ بردو لأ ............ طيب مصر دى ايه حكايتها .انا حاسس الإحساس ده وعارف انكو كلكوا حاسين نفس الإحساس ........ كل ما احاول اكرهها ميهونش عليا اقولها ..... كل ما افكر انى اهاجر قلبى مايطاوعنيش انى اتخيل حتى .... كل ما اتخنانق مع سواق ميكروباص أو مدرس فى مدرستى ..... اقابل راجل أو شاب طيب مبتسم قاعد جمبى فلا املك إلا الإبتسام ....... كل ما اتقزز من افعال الشرطة ومن التعامل معاهم ....... اقع فى ظابط ابن ناس اوى ومحترم والاقيه بيعامل الناس كويس ...... كل ما افتكر مشاكل سواقين التاكسى اركب مع سواق تانى راجل بركة يدعيلى ويطبطب عليا ........ كل ما اتخنق من البنات الكاسيات العاريات اقابل اخت محترمة كويسة اوى .... اقول الحمد لله الدنيا بردو بخير ............ كل اما اشوف العراق واللى بيحصل فيها واتخيل ان ده ممكن يحصل لمصر احس بألف شوكة فى قلبى واحس ان الدم بيغلى فى عروقى وعايز اقف على حدودها واموت الف مرة دفاعا عن بلادى .يا جماعة انا بجد مش فاهم ..... يا ترى جيلنا ده بيحب مصر ولا لأ ؟ وحد يرد عليا يفهمنى هو انا لوحدى اللى متعذب فى حب وكراهية البلد دى ولا ده إحساس جيلنا كله ؟؟؟ تعالو نواجه نفسنا ونجاوب عالسؤال ده

ياترى احنا لسة بنحب مصر ؟؟؟؟

[hadjer>]

http://www.m5znk.com/uploads/images/m5znk-39784adbbc.gif (http://www.m5znk.com)

اسمح لي ياهيما ارد على موضوعك مع انه انا مش مصرية

لكن بجد موضوعك ملفت للاهتمام وطرحه يلم بجوانب الحياة اليومية كلهاااااااااااااااااااااااااااااا

يمكن فيه اختلاف لان احنا معنديناش ازمة مواصلات بالجزائر

لكن التحيز والرشوة والبيروقراطيه والخوف من الشارررررررررررع زي عندنا زي عندكم والله البنت هنا لسه بتخاف من الخروج لوحدها لانه التحرش بقى كتيييير وكمان حكاية الكاسيات العاريات دي بقت موضة
والكل بيقلد بعض يعني ده واقع المجتمع العربي كله تقريبا تقليد اعمى وتبعية للغرب وفساد وانحلال تحت مبدا التطور

عارف يا هيما ماحدش هيهتم لا سلطه ولا غيره لانهم فرحانين بده
الناس بكده هتهتم بحاجات هايفة وهتغفل عن الاساسيات

والمتدمر الوحيد الغلابه على رايكم

لكن طبعا هيكون فيه جزء مميز وسط الشردمه دي

موضوعك بجد مميز جدا

طاب قلمك ودمت متميزا بابدعاتك

تقبل مروري

[ال كابونى]

السلام عليكم ورحمة الله
اخى هيما لاول مرة هارد وبطلت اختصار للكلام
شوف كلمة بنحب مصر لسه ولا بطلنا نحبها بالرغم من كل ماقلته من مشاكل
هاسألك يعنى ايه مصر ما المقصود بمصر
مش هانتظر منك تجاوب مصر ممكن تكون كل العيوب اللى انت قولتها
لكن فى حاجه دايما بتفوت على بالنا
اللى يسال السؤال بتاعك ده لازم يحدد احنا ياترى
مبسوطين فى الاوضاع اللى فى مصر دلوقت ولا لا
مش يقول بنحب مصر ولا خلاص بطلنا نحبها هناك فرق بين السؤالين
الاوضاع اللىفيها معظم الشباب والناس ماتسرش حد انا معاك
لكن مصر هاقولك بقى ايه المقصود بيها عشان الامور ما تختلطش على الناس
مصر هى اهلك واصحابك وبيتك وغيطك والناس اللى بتقولهم السلام عليكم
مصر معنى تانى غير
اما الاوضاع اللى فيها الناس دلوقت ماتسرش حد ودى ان شاءالله
كبوة ودايما بقولها قد يعثر الجواد يا هيما اوعى تخلى حاجه تاثر
على نفسك وعلى الناس بسوء فهم او خيانة تعبير
هاضربلك مثل ليك صاحب وبتحبه اكتر من اخوك اخوه الصغير شتمك
هاتعمل ايه
بلاش ده هاضربلك مثل تانى صريح ومباشر خلى حد يشتم مصر قدامك
من جنسيه تانيه وورينى بفطرتك السليمه هاتتصرف ازاى
ابقى راعى عند سؤالك هل تقصد الاوضاع ولا تقصد مصر كوطن وبلد
معلش لو كنت طولت عليك بس لازم الناس تفهم الفرق
مشكور هيما على موضوعك ماتزعلش من تعقيبى
اخوك أحمد مش هاكتبلك ال كابونى

[شــــــاعر الاحــــــزان]

الاول

السلام عليكم

بص ياابراهيم

لو واحد عند ام بس قاسيه شويه في معاملتها معاه طبعا بيبقي قرفان ومضايق في عشته

صح صح

طيب لو قلتله تقدر تستغني عنها يقلك ايه

طبعا ميقدرش

مصر بقي كده

رغم كل ده



؟؟؟؟مصر بلدنا اللى اتحولت الحياة فيها لمعاناة مستمرة من اول ما تفتح عينيك الصبح لحد ما تغمضها باليل ...... تنزل الصبح من البيت ويبدأ الصراع .... صراع مع سواق الميكروباص وصراع مع ركاب الميكروباص ..... صراع مع زميلك فى الشغل وصراع مع ظابط المرور ومع سواق التاكسى ومع موظفين الحكومة ومع الناس اللى فى الشارع وصراع مع أصحابك فى الجامعة او المدرسة وصراع مع المدرسين ....... سيبك طبعا من صراع غض البصر اللى غالبا بتخسر فيه لأنك ممكن تخبط فى عامود نور وانت ماشى عشان مبقاش ينفع تبص غير فى الأرض ......



لكن اسمها مصر

وانا لسه بحبها

والله مهما عملت فيا مصر دي لازم احبها ومش كلام ياهيما

كفايه اننا منها

انا ليا الشرف
اني منك ياام الدنيا

ممكن ردي ميعجبش ناس كتيره

كن انا مصمم علي رايي وعمري ابدا ما حغيره ض39


ايم سوري ياهيما ض39

وكلنا لازم نقول ايم سوري هههههههههههههههههه

لان مصر متستحقش كلمه تتقال في حقها مهما عملت فينا

انا عارف اني رغاي اوي

يالا ياض بقي ض1

[الرحمه من عندك يارب]

السلام عليكم ورحمة الله وبركاته


...... مصر اللى مبقاش فيها حاجة صح لا تعليم ولا صحة ولا إسكان .... مصر اللى الشرطة فيها بتقهرنا واصحاب رأس المال بيستعبدونا .... مصر اللى شعبها من كتر الهم والجوع اتخلقت عنده عقد نقص وكراهية ضد الأخرين ..... مصر اللى كتر فيها الإجرام وبدل شهامة ولاد البلد ... بقى تحرش الولاد بالبنات فى وسط البلد ..... مصر اللى تخاف على بنتك ومراتك واختك يمشوا لوحدهم فى الشارع خايف عليهم من 1000 خطر ... تحرش وسرقة وسفاح المعادى ورخامة امناء الشرطة وغلاسة ولاد البلد .

اخى الكريم هيما انت بهذه الكلمات تظلم مصر مصر الخير كله كان فيها


هيما مش مصر الى علمت كدا وانت عارف


احنا الى خربنا مصر


بصناعتنا وحقدنا وبالتكنولوجيا


مصر دى حنونه اوى


هيما انت لو عشت ايام زمان كنت تعرف ان مصر غاليه علينا اوى


هيما انت طبعا عارف ان مصر دى عزيزه علينا وكمان عند الله سيحانه وتعالى

ذكرها اكتثر من مره ف القران الكريم


هيما لازم نعرف ان مش مصر الى علمت كدا


احنا يا هسما احنا احنا احنا احنا الى ظلمناها وظلمنا اسمها


بدانا نحط اسمها ف كل كلمه ظلم


ياريت نحط مصر فى اى كلمه خير


احنا نسينا كل حاجه خير هيه عملتهالنا وافتركنا الشر ليها


على العموم انا بحب مصر لانها امى واغلى حاجه عندى لانهنا امى الثانيه بعد امى الى ولدتنى

شكرا يا هيما على قلمك الطيب وعلى ابداعك وصراحتك


سسوال ليك انت ويار ب اجاوب بصراحه زى مكتبت الموضوع بصراحه



انت بتحب مصر؟؟؟؟؟؟


شكرا يا هيما على الموضع دا


وتقبل مرورى


اخوك / احمد المصرى

[اعذريني بحب مصر]

.
.


عارف ياض

انا كان عندي نفس شعورك ده ويمكن اكتر

لغايه لما جيت المنتدي هنا.....لقيت شويه شتيمه في مصر

قلت ديمقراطيه وخليك يا واد مخك كبير بس بعد شويه حسيت لا

دا مصر بس اللي بتتشتم واي كلام او نقد موجه لدوله تانيه يحذف فورا

يعني رئيس مصر بس اللي عميل وخاين ومصر بس هي اللي طبعت

وهما القاده بتوعهم في الصور نازلين احضان مع الاسرائليين

بس زي الكابوني ما قال لقييت نفسي وحش كاسر مش طايق كلمه علي مصر

لما لقيت اللي من الدول النانيه بتشتم مصر لا والف لا

شوفت لما سالت السؤال ده خليت الكل ينطق

تحياتي

ملحوظه انت بطلت تيجي القهوه ليه الساعه 6 الصبح زي الاول

[لحن الوفاء]

عليكم السلام ورحمة الله وبركاته


بقى تحرش الولاد بالبنات فى وسط البلد ..... مصر اللى تخاف على بنتك ومراتك واختك يمشوا لوحدهم فى الشارع خايف عليهم من 1000 خطر ... تحرش وسرقة وسفاح المعادى ورخامة امناء الشرطة وغلاسة ولاد البلد .شايفين بلادنا بقيت عاملة إزاى يا جماعة ؟


ايه يا عم ابراهيم انت قطعت البلد خالص وخلتها ما تسوي في سوق البلاد بجنيه وربع

معك حق حال البلد بقي مش زي زمان خالص

بس انت مسودها خالص كده ليه خالي عندك امل ونظره حلوه للمستقبل

اهوه البلد وكلنها الحرميه والاحتكار واشياء كثير غير طبيعيه بالمره

بس مش كل الناس غير شرفاء ومحتلين

يوجد ناس تعمل بجد وجهد وحق وضمير للرفعه وعلو هذه البلد بس للاسف لا يسمع لهم صوت وهم اصلا نقطه في بحر

وبعدين احنا حالنا احسن بكتير من بلاد ثانيه بدون ذكر اسماء

ما نقدر غير قول

اللهم احمي مصر من شر الاعداء

تسلم وسلمت يدك علي طرحك المفيد

يعطيك الف عافيه يارب

مع التقدير لك اخوك

لحن الوفاء

[math master]

الجيل ده بيحب مصر لأنه جيل من المصريين بس الفرصه مجتوش عشان يعبر عن حبه زى جيل الثوره او 73 احنا جيل مرفه بس مشاكلنا احنا اكتر العيب مش فيها والله العيب مش فيها العيب فينا احنا

[الحــــــب كــــــــدة]

مشكووووووووورين على مروركم وعاجبنى بصراحة ردودكم يعنى احنا كلنا شايفين مصر ان الى فيها مش وحشين بس اللى بيحصل بيزعل وكل الناس مش وحشة وربنا يفقنا ومنخفش ربنا معانا

[امير النور]

هيماااااااااااااااا كالعادة مواضيعك رائعة وجميلة وانا بوافقك فى وجهة نظرك

[الحــــــب كــــــــدة]

مشكووووووووور على مرورك

اما يااعزرينى عملت بنصيحتك هههههههههههههههههه

[ريمكساوى]

شكرا على الموضوع وننتظر مزيدك................

[mony2m]

شكرا ليك يا هيما على طرحك للمو ضوع
بس انا عندى ليك سؤال ممكن تبص جواك كده كويس
ياترى هتلاقى ايه
اقولك هتلاقى قلب طيب قلب بيحب بلده واهل بلده مهما عملوا فيه
او عملت فيه بلده
هو ده بقى القلب المصرى القلب الطيب
كل الناس مهما ان عملوا لسه جواهم طيب جواهم طيبة مصر
الطيبه بتاعة زمان فاكرها انا ممكن مكنش حاسه باللى بيحصل فى مصر بالضبط
علشان انا مش قاعده فى مصر نفسها بس بروحا وانا شفت اللى قولت عليه
ممكن اقولك بكل ثقه ان فى بلدى لسه الطيبه موجوده
والموده والحب بينهم
ومهما حصل فى مصر فهى هتكون بخير
هيما مصر لسه بخير

[الراجي]

الحب كده

عارف انا في مره سافرت ابو ظبي زياره قعت 3 شهور

كل شئ جميل ومنظم شوارع نضيفه ومافيش حد يكسر اشاره او يعاكس

انبهرت وسالت ليه الواحد مايعيش هنا علي طول

عارف بعد شهر واحد بس زهقت حسيت عايز ارجع

اتاري مصر حلاوتها في اللخبطه والسبهلله

والبساطه والحريه انك تعمل اللي انت عايزه

هي دي مصر ام الدنيا

[امير النور]

هيمااااااااااا احنا فينا الى مكفينا بس تعرف مجهود اكتر من رائع تسلم ايدك ياغالى اخوك اميـــــــــــــــــــر

[بساط الريح]

مش بي قولو ام الدنيا وادخلوها امنين ماتخفش انشاالله مصر بخير
تقبل مروري وتحياتي

[حماده الجازوى]

السلام عليكم ورحمة الله وبركاته

تسلم اخى هيما على موضوع جميل لكن انا بحب مصر

تسلم ايدك على طرح موضوع جميل

[سكون المحيط]

اه طبعا انا هفضل بحب مصر طول عمرى بغض النظر عما يحدث من فساد بداخلها
مشكور على الموضوع
http://www.m5znk.com/uploads/images/m5znk-5fe8abfa09.gif (http://www.m5znk.com)

[لـّ~ـيـّ~ـآ‘لـّ~ـي ـآ‘لـّ~ـصـّ~ـمـّ~ـت]

بص انا معنديش كلام بعد اللي هما قالو

لانهم جابو الصح عمرنا مهنكره مصر

بس صدقني العيب في الناس اللي

في المكان مش في المكان نفسة

يعني لو كل واحد يغير من نفسة

ويراعي ربنا هتلاقي نتيجة تانيه خالص

لكن كل الناس بقت بتتكلم بمنطق المصلحة وبس

محدش بيراعي ضميره

تسلم يا هيما تقبل مروري

[لا تسالني من انا]

بحبك بحبك بحبك بحبك يا مصر
مسايا و صباحى أسبح بحبك
و حبك شفايا و جراحى يا مصر
و اسافر بحبك و اميل زى ميلك
وتحلا الخطاوى فى حبك يا مصر
واحب اغترابى فى صبحك و ليلك
و احب الونس بالرفاقه يا مصر
بحبك ..بحبك بحبك يا مصر
تنام الدموع في العيون الهواجع
و تسهر دموعي في حبك يا مصر
تهون السجون و الشجون و المواجع
و يغلى مع القهر .. حبك يا مصر
ولو يحبسوني .. و لو يشنقوني .. و لو فكروا بالعذاب يبعدوني
هاقرب .. و أقرب و مش ممكن أهرب
وتنزل على خدودي تشرب
تلاقي الرموش و الخدود و المباسم .. المراسم .. مباسم .. مراسم
وصورتك عليهم يا مصر
بحبك .. بحبك .. بحبك يا مصر


اولا اهلا بيك

منور المنتدى

بالنسبة لموضوعك

بصراحة حلو جدا جدا

مين فينا ما بيحبش والده ووالدته

مين فينا ما بيحبش اخواته

مين فينا ما بيحبش نفسه


اعتقد كلنا بنحب انفسنا حتى لو كان حبنا لاهلنا ضعيف شوية

بس ما فيش حب فى الدنيا يساوى حب الشخص لنفسه

انت قلت جملة فى غاية الجمال وبصراحة هي الحل لكل كلامك

العيب فينا احنا

بس يا ترى احنا مين

احنا المسؤلين فى كل المناصب

ولا احنا ولاد الوزراء ورجال الاعمال

ولا احنا الناس الغلابة اللى يا دوب ماشية بما يرضى الله

اى احنا بالظبط انت تقصده

اعتقد لو كنا احنا اللى العيب فينا اللى المفروض اننا اخر مجموعة من البشر

يبقى فعلا حلال فينا عبارة عليها اكتر من 4 الالاف مصرى تغرق وما يحصلش حاجة

لو كان العيب فينا احنا الناس الغلابة يبقى حلال قطر الصعيد يولع فينا وما فيش حاجة اتغيرت

لو كان العيب فينا يبقى يسبونا نهاجر ونسيب البلد دى

حتى لما جينا نسافر القدر ما سمحش لينا اننا نسيب البلد

القدر كتب علينا اننا نموت فى مركب صغير على شواطئ اروبا
لو كان العيب فينا يبقى فعلا حلال فينا اننا نروح الجامعة والندرج مخنوق

لو كان العيب فينا يبقى اللى بيحصل لما تركب اتوبيس محترم تطلع تلاقى كرسى تقعد عليه

لو كان العيب فينا كنا بعد التخرج لقينا وظايف نشتغلها عشان ما نوصلش اننا نقدم فى اعلان اوعى القطر يفوتك وفى الاخر تطلع الوظيفة شيال فى شكركة مقاولات

لو كان العيب فينا يبقى حلال اللى بيحصل فينا من غلاء الاسعار وبعد كام سنة من حكونة الاكترونى نظيف الرئيس يلقى باللوم فى ارتفاع الاسعار على حكومة نظيف

لو كان العيب فينا ما كانش كل واحد معاه شوية فلوس ينهب الشعب بكل ما اوتى من قوة

لو كان العيب فينا كان بقى الشباب خارج من بيته رايق نسرح شعره حاطط برفان وخارج يروح شغله ببال رايق

مش ماشى يكلم نفسه فى الشارع

مش صح ولا ايه ؟؟؟؟؟؟؟؟؟؟؟؟؟؟؟؟؟


يا ترى باة العيب فى مين ؟؟؟؟؟؟؟؟؟؟